غیر رجسٹرڈ سپلائرز سے خریداری پر ودہولڈنگ ٹیکس کا بڑھانے کی تجویز

اسلام آباد: وفاقی حکومت نے مالی سال 2026-27 کے بجٹ میں غیر رجسٹرڈ افراد اور سپلائرز سے خریداری پر ودہولڈنگ ٹیکس کے دائرہ کار میں مزید توسیع کی تجویز پیش کردی ہے۔

وفاقی وزیر خزانہ سینیٹر محمد اورنگزیب نے قومی اسمبلی میں بجٹ تقریر کے دوران کہا کہ اس وقت اگر کوئی کمپنی کسی غیر رجسٹرڈ سپلائر سے سامان خریدتی ہے تو ادائیگی کے وقت اس سے ودہولڈنگ ٹیکس وصول کیا جاتا ہے۔

انہوں نے بتایا کہ حکومت اب اس نظام کو مزید وسعت دینے کی تجویز رکھتی ہے تاکہ نہ صرف کمپنیاں بلکہ افراد اور ایسوسی ایشن آف پرسنز بھی اگر غیر رجسٹرڈ سپلائر سے خریداری کریں تو ان پر بھی ودہولڈنگ ٹیکس عائد ہوگا۔

وزیر خزانہ کے مطابق اس اقدام کا مقصد ٹیکس نیٹ کو وسیع کرنا اور غیر رسمی معیشت کو دستاویزی نظام میں لانا ہے تاکہ محصولات میں بہتری لائی جاسکے۔

انہوں نے مزید بتایا کہ فیڈرل بورڈ آف ریونیو کے لیے نیا ٹیکس آپریٹنگ ماڈل متعارف کرایا جارہا ہے جس کے تحت نیشنل فیس لیس سینٹر قائم کیا جائے گا۔

اس نئے نظام میں فیس لیس ونگ کے پاس آڈٹ، اسیسمنٹ اور کوالٹی کنٹرول کی ذمہ داریاں ہوں گی جبکہ فیلڈ آپریٹنگ ونگ رجسٹریشن، تصدیق اور ریکوری کے امور انجام دے گا۔