بجٹ میں تنخواہ دار افراد کیلئے بڑا ریلیف، ٹیکس شرح میں کمی کی تجویز

اسلام آباد: وفاقی حکومت نے آئندہ مالی سال کے بجٹ میں تنخواہ دار طبقے کو ریلیف دینے کیلئے انکم ٹیکس کی مختلف شرحوں میں کمی اور اضافی ٹیکس ختم کرنے کی تجویز پیش کردی۔

وفاقی وزیر خزانہ محمد اورنگزیب نے قومی اسمبلی میں بجٹ پیش کرتے ہوئے کہا کہ حکومت کا مقصد تنخواہ دار افراد پر مالی دباؤ کم کرنا اور انہیں زیادہ سہولت فراہم کرنا ہے، اسی مقصد کے تحت آمدنی کے مختلف درجوں پر ٹیکس کی شرحوں میں ردوبدل تجویز کیا گیا ہے۔

انہوں نے کہا کہ سالانہ 22 لاکھ سے 32 لاکھ روپے آمدن رکھنے والے افراد کیلئے انکم ٹیکس کی شرح 23 فیصد سے کم کرکے 20 فیصد کرنے کی سفارش کی گئی ہے۔ اسی طرح 32 لاکھ سے 41 لاکھ روپے سالانہ آمدن پر ٹیکس کی شرح 30 فیصد سے کم کرکے 25 فیصد کرنے کی تجویز دی گئی ہے۔

وزیر خزانہ کے مطابق 41 لاکھ سے 56 لاکھ روپے سالانہ آمدن رکھنے والوں کیلئے ٹیکس کی شرح 29 فیصد جبکہ 56 لاکھ سے 70 لاکھ روپے آمدن پر ٹیکس کی شرح 32 فیصد مقرر کرنے کی تجویز بجٹ کا حصہ ہے۔

انہوں نے بتایا کہ تنخواہ دار طبقے پر عائد اضافی ٹیکس ختم کرنے کا فیصلہ بھی کیا گیا ہے، جس سے لاکھوں ملازمت پیشہ افراد مستفید ہوسکیں گے۔

محمد اورنگزیب نے مزید کہا کہ سالانہ 15 کروڑ سے 50 کروڑ روپے آمدن کے مختلف درجوں پر عائد سپر ٹیکس ختم کرنے کی تجویز دی گئی ہے، جبکہ 50 کروڑ روپے سے زائد آمدن رکھنے والوں کیلئے سپر ٹیکس کی شرح 10 فیصد سے کم کرکے 8 فیصد کرنے کی سفارش کی گئی ہے۔