قومی اقتصادی سروے آج پیش کیا جائے گا، بیشتر معاشی اہداف حاصل نہ ہوسکے

رواں مالی سال کا قومی اقتصادی سروے آج پیش کیا جائے گا، جس میں معاشی کارکردگی کے اہم اشاریے سامنے لائے جائیں گے۔

دستاویز کے مطابق رواں مالی سال میں مجموعی طور پر زیادہ تر معاشی اہداف حاصل نہیں کیے جا سکے۔ ملکی مجموعی قومی پیداوار کی شرح نمو 3.7 فیصد رہی جبکہ مقررہ ہدف 4.2 فیصد تھا۔ اسی طرح فی کس آمدن کا سالانہ ہدف بھی پورا نہ ہوسکا۔

اعداد و شمار کے مطابق فی کس سالانہ آمدن 5 لاکھ 33 ہزار 629 روپے تک پہنچ گئی ہے۔ زرعی شعبے کی شرح نمو 2.89 فیصد رہی جبکہ ہدف 4.5 فیصد مقرر کیا گیا تھا۔ صنعتی شعبے کی گروتھ 3.51 فیصد رہی جو 4.3 فیصد کے ہدف سے کم ہے۔

بجلی، گیس اور پانی کی فراہمی کے شعبے میں شرح نمو منفی 10.63 فیصد ریکارڈ کی گئی جبکہ اس کا ہدف 3.5 فیصد تھا۔ خدمات کے شعبے کی شرح نمو 4.09 فیصد رہی جو معمولی طور پر ہدف کے قریب ہے۔