پیٹرول اور ڈیزل 22 روپے سستا، نئی قیمتیں 381 روپے 78 پیسے اور 380 روپے 78 پیسے مقرر

وفاقی حکومت نے ایک ہفتے کے لیے پیٹرولیم مصنوعات کی قیمتوں میں بڑی کمی کرتے ہوئے پیٹرول اور ڈیزل کی قیمت میں بائیس، بائیس روپے فی لیٹر کمی کا اعلان کردیا ہے۔

حکومتی اعلامیے کے مطابق نئی کمی کے بعد پیٹرول کی قیمت تین سو اکیاسی روپے اٹھہتر پیسے فی لیٹر جبکہ ڈیزل کی قیمت تین سو اسی روپے اٹھہتر پیسے فی لیٹر مقرر کردی گئی ہے۔

وزیراعظم شہباز شریف نے کہا ہے کہ عوام کو معاشی ریلیف فراہم کرنا حکومت کی اولین ذمہ داری ہے اور اسی مقصد کے تحت پیٹرولیم مصنوعات کی قیمتوں میں کمی کا فیصلہ کیا گیا۔

پیٹرولیم ڈویژن کی جانب سے جاری نوٹیفکیشن میں بتایا گیا ہے کہ نئی قیمتوں کا اطلاق رات بارہ بجے کے بعد ہوگا۔

دوسری جانب مٹی کے تیل کی قیمت میں بھی نمایاں کمی کی گئی ہے۔ اوگرا کے نوٹیفکیشن کے مطابق مٹی کا تیل اکتالیس روپے چوالیس پیسے فی لیٹر سستا ہونے کے بعد دو سو بہتر روپے فی لیٹر مقرر کردیا گیا ہے۔

واضح رہے کہ اس سے قبل مٹی کے تیل کی قیمت تین سو تیرہ روپے چوالیس پیسے فی لیٹر تھی۔