راحت فتح علی خان کو وراثتی جائیداد تنازع کیس میں ریلیف مل گیا

لاہور: وراثتی جائیداد کے دیرینہ تنازع کیس میں عالمی شہرت یافتہ پاکستانی گلوکار راحت فتح علی خان کے لیے اچھی خبر سامنے آئی ہے، جہاں لاہور ہائیکورٹ نے انہیں ایک بڑا قانونی ریلیف فراہم کر دیا ہے۔

تفصیلات کے مطابق لاہور ہائیکورٹ کے معزز جج جسٹس محمد ساجد محمود سیٹھی نے راحت فتح علی خان کی درخواست پر 8 صفحات پر مشتمل تحریری فیصلہ جاری کیا۔ ہائیکورٹ نے کورٹ فیس جمع نہ کرانے کی تکنیکی بنیاد پر راحت فتح علی خان کی اپیل خارج کرنے کا ٹرائل کورٹ کا فیصلہ یکسر کالعدم قرار دے دیا ہے۔ عدالتِ عالیہ نے گلوکار کی اپیل کو دوبارہ بحال کرتے ہوئے انہیں ایک لاکھ روپے جرمانہ سرکاری خزانے میں جمع کرانے کی ہدایت کی ہے۔

تحریری فیصلے کے مطابق راحت فتح علی خان نے فیصل آباد میں واقع 1 کنال 9 مرلہ ڈبل اسٹوری مکان پر قبضے کی تصدیق کے لیے سول کورٹ میں دعویٰ دائر کر رکھا تھا۔ سول عدالت نے 14 مئی 2019 کو راحت فتح علی خان کے خلاف ڈگری جاری کی تھی، جس کے بعد انہوں نے اس فیصلے کو ٹرائل کورٹ (سیشن عدالت) میں چیلنج کیا۔ تاہم، ٹرائل کورٹ نے محض 15 ہزار روپے کی کورٹ فیس جمع نہ کرانے پر تکنیکی بنیادوں پر ان کی اپیل خارج کر دی تھی، جس کے خلاف گلوکار نے ہائیکورٹ سے رجوع کیا۔