انگلینڈ کے خلاف شاندار کامیابی، صدر اور وزیراعظم کی قومی کرکٹ ٹیم کو مبارکباد

سہ ملکی ون ڈے سیریز کے سنسنی خیز میچ میں انگلینڈ کے خلاف تاریخی کامیابی پر صدر مملکت آصف علی زرداری اور وزیراعظم شہباز شریف نے قومی کرکٹ ٹیم کو مبارکباد پیش کرتے ہوئے ان کی شاندار کارکردگی کو سراہا ہے۔

صدر مملکت آصف علی زرداری نے ایک وکٹ سے فتح حاصل کرنے پر کھلاڑیوں کی تعریف کرتے ہوئے کہا کہ قومی ٹیم نے عزم، حوصلے اور بہترین کھیل کا مظاہرہ کرتے ہوئے قوم کو یادگار فتح سے ہمکنار کیا۔ انہوں نے کہا کہ مشکل حالات کے باوجود کھلاڑیوں نے ہمت نہیں ہاری اور آخری وقت تک جدوجہد جاری رکھی۔

وزیراعظم شہباز شریف نے اپنے پیغام میں کہا کہ ہر رن، وکٹ اور کیچ میں قومی ٹیم کا جذبہ، نظم و ضبط اور صلاحیت نمایاں رہی۔ انہوں نے خاص طور پر شاداب خان کی شاندار سنچری اور حارث رؤف کے ساتھ ان کی اہم شراکت داری کی تعریف کی جس نے میچ کا پانسہ پلٹ دیا۔ وزیراعظم نے کہا کہ لاہور کے کرکٹ شائقین کا جوش و خروش پوری قوم کی آواز بن گیا اور اس کامیابی نے لاکھوں پاکستانیوں کے دل خوشی سے بھر دیے۔ انہوں نے چیئرمین پی سی بی محسن نقوی اور پوری انتظامیہ کی کاوشوں کو بھی سراہا۔