سفارتکاری کیلئے تیار، جارحیت کا جواب دینے کی صلاحیت بھی رکھتے ہیں: اسماعیل بقائی

ایران نے امریکا پر مذاکرات کے دوران یکطرفہ اور غیر منطقی مطالبات مسلط کرنے کا الزام عائد کرتے ہوئے واضح کیا ہے کہ وہ سفارت کاری کے لیے ہمیشہ تیار ہے، تاہم کسی بھی ممکنہ جارحیت کا بھرپور اور مؤثر جواب دینے کی کامل صلاحیت رکھتا ہے۔

جرمن نشریاتی ادارے ‘اے آر ڈی’ (ARD) کو انٹرویو دیتے ہوئے ایرانی وزارتِ خارجہ کے ترجمان اسماعیل بقائی نے کہا کہ ایرانی عوام کو امریکا پر بالکل اعتماد نہیں، اسی لیے ملکی دفاع کو مضبوط رکھنا وقت کی ضرورت ہے۔ انہوں نے کہا کہ ایران نے کبھی مذاکراتی میز نہیں چھوڑی اور نہ ہی سفارتی راستے بند کیے ہیں، اب بھی ثالثوں کے ذریعے پیغامات کا تبادلہ جاری ہے۔ تاہم امریکا سفارت کاری کی آڑ میں ایران سے “مکمل سرنڈر” کا مطالبہ کر رہا ہے، جسے کوئی بھی خوددار ایرانی قبول نہیں کرے گا۔

ترجمان ایرانی وزارتِ خارجہ کا کہنا تھا کہ مذاکراتی عمل کے دوران ایک سال سے بھی کم عرصے میں ایران پر کیے گئے دو حملوں نے ثابت کر دیا ہے کہ واشنگٹن پرامن حل میں سنجیدہ نہیں ہے۔ اسماعیل بقائی نے یورپی یونین کے نقشِ قدم پر تنقید کرتے ہوئے کہا کہ یورپ نے عالمی برادری کی توقعات کے برعکس آزادانہ کردار کے بجائے امریکی پالیسیوں کی پیروی کو ترجیح دی اور ایٹمی معاملے پر اپنا تعمیری کردار ترک کر دیا۔