ٹیلر سوئفٹ کے کنسرٹ پر حملے کی منصوبہ بندی کرنے والے شخص کو سزا

ویانا: بین الاقوامی شہرت یافتہ امریکی گلوکارہ ٹیلر سوئفٹ کے کنسرٹ پر دہشت گردانہ حملے کی خوفناک منصوبہ بندی کرنے والے مرکزی ملزم کو عدالت نے 15 سال قید کی سزا سنا دی ہے۔

غیر ملکی میڈیا کے مطابق عدالت میں پیش کیے جانے والے 21 سالہ آسٹرین شہری نے اپنے اوپر عائد دہشت گردی کے تمام الزامات کا اعتراف کر لیا ہے۔ واضح رہے کہ اس خطرناک ملزم کو سال 2024 میں ٹیلر سوئفٹ کے طے شدہ کنسرٹ سے محض ایک روز قبل ایک بڑے آپریشن کے دوران گرفتار کیا گیا تھا، جس کے بعد سیکیورٹی خدشات کے باعث کنسرٹ کو فوری طور پر منسوخ کر دیا گیا تھا۔

دورانِ سماعت عدالت کو بتایا گیا کہ ملزم اکیلا نہیں تھا بلکہ ایک باقاعدہ نیٹ ورک کا حصہ تھا۔

عدالت میں کارروائی کے دوران ملزم اور اس کے ساتھی نے نہ صرف ٹیلر سوئفٹ کے کنسرٹ کو نشانہ بنانے کا جرم قبول کیا، بلکہ انہوں نے مشرقِ وسطیٰ کے مختلف علاقوں میں بھی دہشت گردانہ حملوں کی منصوبہ بندی کرنے کا اعتراف کیا ہے۔

عدالت نے جرم کی سنگینی اور عالمی امن کو خطرے میں ڈالنے کی پاداش میں ملزم کو 15 سال قیدِ باجبر کی سزا سناتے ہوئے جیل منتقل کرنے کا حکم دے دیا ہے۔