بھارت کی جنوبی افریقا سے بدترین شکست، ورلڈ ٹیسٹ رینکنگ میں پاکستان سے بھی پیچھے

ہوم گراؤنڈ پر ایک اور عبرتناک کلین سوئپ کے بعد بھارتی ٹیم ورلڈ ٹیسٹ چیمپئن شپ رینکنگ میں پاکستان سے بھی نیچے چلی گئی ہے۔
بدھ کے روز گوہاٹی ٹیسٹ میں جنوبی افریقا نے بھارت کو 408 رنز سے شکست دے کر سیریز 0-2 سے اپنے نام کی، یوں بھارتی سرزمین پر 25 سال بعد ٹیسٹ سیریز جیتنے کا تاریخ ساز کارنامہ انجام دیا۔

549 رنز کے بھاری ہدف کے تعاقب میں بھارتی بیٹنگ لائن ایک بار پھر بری طرح ناکام رہی اور پوری ٹیم صرف 140 رنز پر پویلین لوٹ گئی۔
یہ دوسرا موقع ہے کہ گوتم گمبھیر کی کوچنگ میں بھارت کو ہوم گراؤنڈ پر کلین سوئپ کا سامنا کرنا پڑا، اس سے قبل 2024 میں نیوزی لینڈ بھی بھارت کو اسی طرح شکست دے چکا ہے۔

تازہ ترین ناکامی کے بعد ورلڈ ٹیسٹ چیمپئن شپ پوائنٹس ٹیبل میں بھارت مزید تنزلی کا شکار ہو کر پاکستان سے بھی پیچھے چلا گیا۔
موجودہ پوائنٹس ٹیبل میں آسٹریلیا پہلی، جنوبی افریقا دوسری اور سری لنکا تیسری پوزیشن پر موجود ہیں۔