یو اے ای میں نیوکلیئر پلانٹ پر ڈرون حملے، حفاظتی نظام فعال، تحقیقات جاری

ابوظہبی: متحدہ عرب امارات میں ڈرون حملوں کے نتیجے میں براکہ نیوکلیئر پاور پلانٹ کے قریب آتشزدگی کا واقعہ پیش آیا، تاہم حکام کے مطابق صورتحال مکمل طور پر قابو میں ہے اور کوئی جانی نقصان رپورٹ نہیں ہوا۔

الظفرہ ریجن میں واقع براکہ پاور پلانٹ کے ایک بیرونی الیکٹریکل جنریٹر کو ڈرون حملے میں نشانہ بنایا گیا جس کے بعد آگ لگ گئی، تاہم فوری کارروائی سے آگ پر قابو پا لیا گیا۔

فیڈرل اتھارٹی فار نیوکلیئر ریگولیشن (ایف اے این آر) کے مطابق واقعے سے جوہری پلانٹ کے مرکزی نظام یا حفاظتی ڈھانچے پر کوئی اثر نہیں پڑا اور تمام یونٹس معمول کے مطابق کام کر رہے ہیں۔

دوسری جانب یو اے ای وزارت دفاع نے کہا ہے کہ ملک کے دفاعی نظام نے تین ڈرونز کو ٹریک کیا، جن میں سے دو کو فضا میں ہی تباہ کر دیا گیا جبکہ ایک ڈرون براکہ کے قریب جنریٹر سے ٹکرا گیا۔

وزارت دفاع کے مطابق حملوں کے مقام اور ذمہ داران کے حوالے سے تحقیقات جاری ہیں اور مکمل رپورٹ بعد میں جاری کی جائے گی۔

حکام نے واضح کیا ہے کہ شہری صرف سرکاری اطلاعات پر اعتماد کریں اور کسی بھی قسم کی افواہوں یا غیر مصدقہ خبروں کو پھیلانے سے اجتناب کریں۔

اماراتی حکام نے کہا ہے کہ ملکی سلامتی کے تحفظ کے لیے دفاعی نظام مکمل طور پر الرٹ ہے اور ہر ممکن خطرے کا فوری جواب دیا جائے گا۔