جیٹ فیول سستا، کمرشل پروازوں کے کرایوں میں بڑی کمی کا امکان

اسلام آباد: وفاقی حکومت نے جیٹ فیول کی قیمت میں نمایاں کمی کا اعلان کر دیا ہے، جس کے بعد ملک میں کمرشل فضائی سفر سستا ہونے کا امکان پیدا ہوگیا ہے۔
تفصیلات کے مطابق جیٹ فیول کی قیمت میں 111 روپے 44 پیسے فی لیٹر کمی کی گئی ہے۔ نئی قیمت 330 روپے 32 پیسے فی لیٹر مقرر کی گئی ہے جبکہ اس سے قبل یہ قیمت 441 روپے 66 پیسے فی لیٹر تھی۔
ماہرین کے مطابق جیٹ فیول فضائی کمپنیوں کے اخراجات کا اہم حصہ ہوتا ہے، اسی لیے قیمتوں میں بڑی کمی کے بعد ہوائی ٹکٹوں کے نرخ کم ہونے کی توقع کی جا رہی ہے۔
حکومت نے لائٹ ڈیزل آئل کی قیمت میں بھی 8 روپے 8 پیسے فی لیٹر کمی کی ہے۔ نئی قیمت 273 روپے 92 پیسے فی لیٹر مقرر کی گئی ہے۔
معاشی حلقوں کا کہنا ہے کہ پیٹرولیم مصنوعات کی قیمتوں میں حالیہ ردوبدل سے مختلف شعبوں پر اثرات مرتب ہوں گے جبکہ فضائی شعبے کو فوری ریلیف ملنے کا امکان ہے۔