مولانا زیرک سیاستدان، اسمبلی میں بیان دے کر ان سے غلطی ہوئی: رانا تنویر حسین

وفاقی وزیر برائے قومی غذائی تحفظ و تحقیق رانا تنویر حسین نے شرقپور میں گرین بس سروس کی افتتاح تقریب کے موقع پر میڈیا سے گفتگو کرتے ہوئے کہا ہے کہ مولانا فضل الرحمان ایک زیرک سیاستدان ہیں، تاہم قومی اسمبلی کے فلور پر بیان دے کر ان سے غلطی ہوئی۔ خیبر پختونخوا کی سیاسی صورتحال پر بات کرتے ہوئے ان کا کہنا تھا کہ گورنر راج زیادہ سے زیادہ 6 ماہ کے لیے لگایا جا سکتا ہے جبکہ ایمرجنسی کا دورانیہ طویل ہوتا ہے، اگر پی ٹی آئی اپنے رویے میں تبدیلی لا کر راہِ راست پر آ جائے تو گورنر راج کے خاتمے پر غور ممکن ہے۔ انہوں نے خلیجی کشیدگی کے باعث گیس و توانائی کے ممکنہ بحران پر تشویش کا اظہار کیا، جبکہ معاشی استحکام کا ذکر کرتے ہوئے بتایا کہ ملکی زرمبادلہ کے ذخائر 26 ارب ڈالر کی تاریخی سطح پر پہنچ چکے ہیں، تاہم اسلام آباد پر آئے روز چڑھائی اور سیاسی احتجاج سے ملکی ترقی کا پہیہ متاثر ہوتا ہے۔