قطر کا پاکستانیوں کے لیے 30 دن کے مفت سیاحتی ویزے کا اعلان

بیرونِ ملک سیاحت کے خواہشمند پاکستانی شہریوں کے لیے قطر کی وزارتِ داخلہ نے پیشگی ویزے کے بغیر پہنچنے پر 30 روز کے مفت ‘ویزا آن ارائیول’ کی سہولت فراہم کرنے کا اعادہ کیا ہے، تاہم اس کے حصول کے لیے بعض لازمی شرائط پوری کرنا ہوں گی۔ سرکاری ویب سائٹ کے مطابق مسافر کے پاسپورٹ کی میعاد کم از کم تین ماہ ہونا، واپسی کا کنفرم ٹکٹ اور قطر کی وزارتِ صحت سے منظور شدہ کمپنی کی ہیلتھ انشورنس ہونا ضروری ہے۔ علاوہ ازیں، وزارتِ داخلہ نے واضح کیا ہے کہ ہوٹل کی بکنگ صرف قطر کے سرکاری سیاحتی پورٹل ‘ڈسکور قطر’ (Discover Qatar) کے ذریعے ہی قابلِ قبول ہوگی اور کسی دیگر آن لائن پلیٹ فارم کی بکنگ پر یہ سہولت فراہم نہیں کی جائے گی۔ تمام مطلوبہ دستاویزات اور شرائط پوری نہ کرنے کی صورت میں ملک میں داخلے کی ضمانت نہیں ہوگی۔