پاکستان نے اسلامی دنیا کو نئی راہ دکھائی، غیرملکی اڈے حفاظت نہیں کر سکتے: خواجہ آصف

وزیر دفاع خواجہ محمد آصف نے سیالکوٹ میں یونیورسٹی آف سینٹرل پنجاب کے کانووکیشن سے خطاب کرتے ہوئے کہا ہے کہ پاکستان نے سفارتی سطح پر اسلامی دنیا کو نئی راہ دکھائی ہے اور یہ ثابت کیا ہے کہ سمندر پار قوتوں کے فوجی اڈے کسی ملک کی حفاظت نہیں کر سکتے۔ انہوں نے کہا کہ پاکستان کی مؤثر سفارت کاری کے باعث ایران اور عرب ممالک کے درمیان فاصلے کم ہوئے ہیں جبکہ پاکستان ایران امریکہ جنگ بندی کے لیے بھی کلیدی کردار ادا کر رہا ہے۔ اپنی سیاسی زندگی اور نیب پر گفتگو کرتے ہوئے ان کا کہنا تھا کہ ملک میں احتساب کے اداروں کو سدھارنے کی ضرورت ہے، انہوں نے اپنے سیاسی سفر کی صعوبتوں کا ذکر کرتے ہوئے کہا کہ معرکۂ حق میں پانچ گنا بڑے دشمن کو شکست دینے کے بعد عالمی سطح پر پاکستان کا وقار بلند ہوا ہے، جس کا اعتراف امریکی صدر ڈونلڈ ٹرمپ بھی متعدد بار کر چکے ہیں۔