اسٹیٹ بینک کا عید الاضحیٰ پر ملک گیر “گو کیش لیس” مہم کا آغاز

اسٹیٹ بینک آف پاکستان نے عید الاضحیٰ 2026 کے موقع پر ملک بھر میں “گو کیش لیس” مہم کا آغاز کر دیا ہے جس کا مقصد مویشی منڈیوں میں محفوظ، آسان اور ڈیجیٹل ادائیگیوں کو فروغ دینا ہے۔

اسٹیٹ بینک کے مطابق ملک بھر میں مویشی منڈیوں میں بڑی سطح پر تجارتی سرگرمیاں ہوتی ہیں جو زیادہ تر نقد لین دین پر مشتمل ہوتی ہیں، اسی رجحان کو کم کرنے اور ڈیجیٹل مالی شمولیت بڑھانے کے لیے یہ اقدام کیا گیا ہے۔

اعلامیے میں بتایا گیا ہے کہ اس سال اس مہم کو مزید وسعت دیتے ہوئے گزشتہ سال کی 54 منڈیوں کے مقابلے میں 96 مویشی منڈیاں شامل کی گئی ہیں۔

ڈیجیٹل ادائیگیوں کی سہولت کے لیے 22 شریک کار بینک مختلف منڈیوں میں خصوصی کیمپ اور سہولت مراکز قائم کریں گے تاکہ خریداروں اور بیوپاریوں کو آسانی فراہم کی جا سکے۔

یہ بینک مویشی فروخت کرنے والوں، ٹرانسپورٹرز اور دیگر سروس فراہم کرنے والوں کو اکاؤنٹ کھولنے اور کیو آر کوڈ کی بنیاد پر ادائیگی کے نظام سے منسلک کریں گے۔

اس کے علاوہ لین دین اور اکاؤنٹ بیلنس کی حد میں عارضی نرمی بھی کی گئی ہے جو 14 مئی 2026 سے 5 جون 2026 تک نافذ العمل رہے گی جبکہ منڈیوں میں موبائل بینکنگ وین اور نقد جمع کروانے والی مشینوں کی سہولت بھی فراہم کی جائے گی۔