یمنی فوج کا حوثی ملیشیا کے خلاف آپریشن فجرِالیمن جاری، 427 جنگجو ہلاک

یمنی مسلح افواج کی جانب سے حوثی ملیشیا کے خلاف ملک بھر میں جاری بڑے عسکری آپریشن ’فجرِ الیمن‘ کے تحت تازہ ترین اور شدید کارروائیوں میں کم از کم 427 حوثی جنگجو ہلاک ہو گئے ہیں۔

یمنی مسلح افواج کے جاری کردہ بیان کے مطابق، گزشتہ چند گھنٹوں کے دوران حوثی قیادت کے اجتماعات اور اہم فوجی قافلوں کو نہایت درستگی کے ساتھ نشانہ بنایا گیا، جبکہ اس دوران حوثی ملیشیا کی کمک، خفیہ فوجی ٹھکانوں اور ان کی رسد کے تمام اہم ذرائع پر بھی بھرپور حملے کیے گئے۔ یمنی فوج کا کہنا ہے کہ صوبہ الجوف کے مختلف محاذوں پر پیش قدمی کرتے ہوئے کئی اہم اور اسٹریٹجک پوزیشنز کا کنٹرول کامیابی سے حاصل کر لیا گیا ہے۔

فوجی ترجمان کے مطابق، آپریشن کے دوران صرف گزشتہ 24 گھنٹوں کے اندر 427 حوثی جنگجو ہلاک کیے گئے جبکہ حوثیوں کی 142 فوجی گاڑیاں، بھاری جنگی سازوسامان اور نقل و حمل کے دیگر ذرائع بھی مکمل طور پر تباہ کر دیے گئے۔ اس طرح یمنی فوج نے اب تک مجموعی طور پر ’آپریشن فجرِ الیمن‘ کے تحت حوثی ملیشیا کے خلاف 1,119 کامیاب کارروائیاں کرنے کا دعویٰ کیا ہے۔