بھارت میں سکھوں کے بدترین قتلِ عام کو 42 سال بیت گئے

بھارت میں سکھوں کے خلاف تاریخ کے بدترین اور انتہائی شرمناک قتلِ عام کو پورے 42 سال بیت گئے ہیں، تاہم آج بھی اس تاریک دور کی یادیں متاثرہ خاندانوں کے دلوں میں تازہ ہیں۔

یکم نومبر 1984ء کا دن بھارتی تاریخ کے سیاہ ترین اور دردناک ترین ابواب میں شمار ہوتا ہے، جب اس وقت کی وزیراعظم اندرا گاندھی کے قتل کے بعد ملک بھر میں سرکاری سرپرستی میں ہولناک سکھ مخالف فسادات کا آغاز ہوا جو تین دن تک مسلسل بلا روک ٹوک جاری رہے۔ ان وحشیانہ فسادات کے دوران ہزاروں بے گناہ سکھوں کو انتہائی بے دردی سے قتل کیا گیا، جبکہ سینکڑوں معصوم خواتین کو وحشت کا نشانہ بنایا گیا۔ یہ افسوس ناک واقعات محض ایک مذہبی اقلیت کے خلاف پرتشدد کارروائیاں نہیں تھیں بلکہ انسانی حقوق، رواداری اور تمام بین الاقوامی اقدار پر ایک کاری ضرب تھے۔

عالمی ذرائع ابلاغ اور مؤقر بین الاقوامی جریدوں نے بھی 1984ء کے اس مسلمہ قتلِ عام کو بھارتی ریاست کی تاریخ کا شرمناک ترین باب قرار دیا ہے۔ معروف جریدے ’دی ڈپلومیٹ‘ کی ایک رپورٹ کے مطابق، انتہاپسند ہندو جتھوں نے سرکاری ووٹر لسٹوں کا استعمال کرتے ہوئے گھر گھر جا کر چن چن کر سکھوں کی شناخت کی اور انہیں موت کے گھاٹ اتارا۔ اسی طرح ’ہیومن رائٹس واچ‘ کی رپورٹس میں بھی اس بات کی تصدیق کی گئی ہے کہ اس وقت کی بھارتی حکومت اور انتظامیہ کی براہِ راست سرپرستی اور چشم پوشی کے تحت سکھوں کے خلاف ایک باقاعدہ اور سوچی سمجی نسل کشی کی مہم چلائی گئی تھی۔