اسحاق ڈار کا مالدیپ کی وزیر خارجہ سے ٹیلی فونک رابطہ، دوطرفہ تعاون پر تبادلہ خیال

نائب وزیرِ اعظم اور وزیرِ خارجہ سینیٹر محمد اسحاق ڈار کا مالدیپ کی وزیرِ خارجہ اریتھشام آدم کے ساتھ ٹیلی فونک رابطہ ہوا ہے، جس کے دوران دونوں رہنماؤں نے دوطرفہ تعلقات، خطے کی صورتحال اور باہمی تعاون کے فروغ کے امور پر تفصیلی تبادلہ خیال کیا۔

دفترِ خارجہ کے ترجمان کے مطابق مالدیپ کی وزیرِ خارجہ اس وقت دولتِ مشترکہ (کامن ویلتھ) کے سربراہانِ حکومت کے اجلاس میں شرکت کے سلسلے میں اینٹیگوا و باربوڈا میں موجود ہیں۔ گفتگو کے دوران مالدیپ کی وزیرِ خارجہ نے مالدیپ کے صدر اور ان کے اعلیٰ سطحی وفد کے حالیہ دورہ اسلام آباد کے موقع پر حکومتِ پاکستان کی جانب سے فراہم کی جانے والی پرتپاک مہمان نوازی اور بہترین میزبانی پر دلی شکریہ ادا کیا۔

دونوں وزرائے خارجہ نے اس امر پر زور دیا کہ پاکستان اور مالدیپ کے درمیان باہمی دوروں کے دوران طے پانے والی مختلف مفاہمتوں اور معاہدوں پر عمل درآمد کے عمل کو مزید تیز کیا جائے، اور دوطرفہ امور پر قریبی رابطے برقرار رکھنے کے عزم کا اعادہ کیا۔ ترجمان دفترِ خارجہ نے مزید بتایا کہ دونوں رہنماؤں نے دولتِ مشترکہ کے جاری اجلاس کے ایجنڈے اور مختلف عالمی و علاقائی پلیٹ فارمز پر کثیرالجہتی تعاون سے متعلق امور پر بھی خیالات کا تبادلہ کیا۔