امریکی ریاست فلوریڈا میں نجی کمپنی کا طیارہ سڑک پرگر کر تباہ، تمام 9 افراد ہلاک

امریکی ریاست فلوریڈا میں ایک نجی مسافر طیارہ ہنگامی حالت میں مصروف سڑک پر گر کر تباہ ہو گیا، جس کے نتیجے میں جہاز میں سوار تمام 9 افراد ہلاک ہو گئے ہیں۔

امریکی وزیرِ ٹرانسپورٹ شان ڈفی (Sean Duffy) نے اس دلخراش فضائی حادثے میں تمام 9 افراد کی ہلاکت کی باضابطہ تصدیق کر دی ہے۔ امریکی خبر رساں ادارے ’ایسوسی ایٹڈ پریس‘ کے مطابق دو انجنوں پر مشتمل ’لیئر جیٹ 60‘ (Learjet 60) نامی اس نجی طیارے نے ریاست ٹیکساس کے شہر آسٹن سے پرواز بھری تھی اور اس کی منزل بہاماس (Bahamas) تھی۔

 ابتدائی اطلاعات کے مطابق طیارہ فضا سے انتہائی تیزی کے ساتھ نیچے اترا اور ایک مصروف شاہراہ کے قریب گر کر تباہ ہو گیا، جہاں گرنے کے بعد زوردار دھماکے سے وہ آگ کے ایک بڑے گولے میں تبدیل ہو گیا۔ اس ہولناک حادثے کے نتیجے میں سڑک پر ایک گہرا گڑھا پڑ گیا، جبکہ غنیمت یہ رہی کہ طیارہ آبادی کے بالکل قریب گرا اور چند فٹ کے فاصلے پر موجود رہائشی گھر محفوظ رہے۔ حادثے کی اطلاع ملتے ہی امدادی ٹیمیں اور پولیس موقع پر پہنچ گئیں، جبکہ امریکی فیڈرل ایوی ایشن ایڈمنسٹریشن (FAA) نے حادثے کی اصل وجوہات کا سراغ لگانے کے لیے نیشنل ٹرانسپورٹیشن سیفٹی بورڈ (NTSB) کی تحقیقات میں بھرپور معاونت کے لیے اپنی ماہر ٹیمیں روانہ کر دی ہیں۔