کمیونسٹ پارٹی چائنہ کے وزیر تین روزہ دورے پر اسلام آباد پہنچ گئے

کمیونسٹ پارٹی آف چائنا (سی پی سی) کی مرکزی کمیٹی کے بین الاقوامی شعبے کے وزیر تین روزہ سرکاری دورے پر دارالحکومت اسلام آباد پہنچ گئے ہیں، جہاں اعلیٰ سطحی حکام نے ان کا پرتپاک استقبال کیا۔

وزارتِ خارجہ کے ترجمان کے مطابق، چینی وزیر کی اسلام آباد ایئرپورٹ آمد پر سینیٹر انوشہ رحمان اور وزارتِ خارجہ کے ایڈیشنل سیکرٹری ڈاکٹر فیصل نے ان کا استقبال کیا۔ ترجمان نے بتایا کہ اپنے اس تین روزہ دورے کے دوران چینی وزیر پاکستان کی عسکری اور سیاسی اعلیٰ قیادت سے اہم ملاقاتیں کریں گے، جن میں دوطرفہ اسٹریٹجک تعلقات، اقتصادی تعاون اور باہمی دلچسپی کے امور پر تبادلہ خیال کیا جائے گا۔ اس کے علاوہ وہ کل وزیرِ خارجہ کے ہمراہ ایک اعلیٰ سطحی تقریب کی مشترکہ صدارت بھی کریں گے۔

ترجمان وزارتِ خارجہ کا مزید کہنا تھا کہ کمیونسٹ پارٹی کے بین الاقوامی وزیر کا یہ دورہ پاکستان اور چین کے مابین ہمیشہ سے جاری قریبی اعلیٰ سطحی سیاسی تبادلوں اور مضبوط دوطرفہ روابط کے تسلسل کا ایک اہم حصہ ہے، جو دونوں برادر ملکوں کے تعلقات کو مزید فروغ دے گا۔