بلوچستان: متعدد خاندانوں کا دہشتگردی میں ملوث اہلخانہ سے اعلانِ لاتعلقی

بلوچستان کے مختلف علاقوں میں متعدد خاندانوں نے دہشت گردی کی گھناؤنی کارروائیوں میں ملوث اپنے بیٹوں اور بھائیوں سے برسرِ عام لاتعلقی کا اعلان کرتے ہوئے ’فتنہ الہندوستان‘ سے شدید نفرت اور بیزاری کا اظہار کیا ہے۔

موصولہ اطلاعات کے مطابق، کوئٹہ میں جہانزیب، نور زیب، انور، مجیب، قاسم اور عبیداللہ کے اہل خانہ نے پریس کانفرنس یا بیانات کے ذریعے ان سے ہر قسم کا تعلق ختم کرنے کا اعلان کیا ہے، جبکہ مستونگ سے تعلق رکھنے والے یونس شاہوانی کے خاندان نے بھی ان کے تمام غیر قانونی اعمال سے لاتعلقی ظاہر کر دی ہے۔ اسی طرح ضلع کچھی میں عنایت اللہ، عبدالنافع، طائب اور یاسر کے اہل خانہ نے بھی اپنے ان بیٹوں اور بھائیوں سے لاتعلقی اختیار کر لی ہے۔

ان تمام خاندانوں کا دوٹوک موقف تھا کہ گھروں سے لاپتا ہونے کے بعد جو افراد دہشت گرد تنظیموں میں شامل ہو گئے ہیں اور ملک دشمن غیر قانونی سرگرمیوں میں ملوث پائے گئے ہیں، ان کے ساتھ اب خاندان کا کوئی لینا دینا نہیں ہے۔ انہوں نے واضح کیا کہ اگر ان کے بیٹے یا بھائی دہشت گردوں کے ایجنڈے پر کام کرتے ہوئے پائے گئے تو وہ قانون نافذ کرنے والے اداروں کے ساتھ مکمل تعاون کریں گے اور ان سے کوئی تعلق نہیں رکھیں گے۔ سرکاری اعداد و شمار کے مطابق، رواں سال جنوری سے اکتوبر 2026ء کے دوران بلوچستان کے مختلف اضلاع میں اب تک 108 سے زائد خاندان اپنے دہشت گرد بیٹوں اور بھائیوں سے عوامی سطح پر لاتعلقی کا اعلان کر چکے ہیں۔