پوتن نے زیلنسکی سے مذاکرات سے کبھی انکار نہیں کیا، ماسکو آ سکتے ہیں، کریملن

روس کے صدر ولادیمیر پوتن کے معاون یوری اوشاکوف کا کہنا ہے کہ روسی صدر نے یوکرینی صدر ولادیمیر زیلنسکی سے بات چیت کرنے سے کبھی انکار نہیں کیا، اور اگر یوکرینی صدر براہ راست اور بالمشافہ مذاکرات کے حقیقی خواہشمند ہیں تو وہ ماسکو آ سکتے ہیں۔

روسی ٹیلی ویژن کے معروف صحافی پاویل زاروبن کو دیے گئے ایک انٹرویو کے دوران جب یوری اوشاکوف سے یہ سوال پوچھا گیا کہ اگر یوکرینی صدر ولادیمیر زیلنسکی روسی صدر پوتن کو براہ راست ٹیلی فون کریں تو کیا وہ ان کی کال وصول کریں گے؟ اس پر کریملن کے معاون نے دوٹوک انداز میں کہا کہ ان کے خیال میں صدر پوتن یقیناً فون کال اٹھائیں گے، کیونکہ انہوں نے کبھی بھی زیلنسکی کے ساتھ رابطے یا بات چیت سے انکار نہیں کیا۔

کریملن کے معاون نے مزید وضاحت کرتے ہوئے کہا کہ اگر یوکرینی صدر محض پیغامات بھیجنے کے بجائے روسی صدر سے بالمشافہ ملاقات اور سنجیدہ مذاکرات کرنا چاہتے ہیں تو ان کے لیے ماسکو آنے کا راستہ ہمیشہ سے کھلا ہے۔ یوری اوشاکوف کے مطابق، اگرچہ زیلنسکی کی جانب سے مختلف ذرائع کے ذریعے مذاکرات کے حوالے سے ابہام اور اشارے دیے جا رہے ہیں، تاہم اگر وہ واقعی امن یا مذاکرات کے خواہش مند ہیں تو انہیں ماسکو آنے میں کوئی رکاوٹ نہیں ہونی چاہیے۔