پانڈا بانڈ کا اجرا پاکستان کیلئے تاریخی کامیابی، عالمی سرمایہ کاروں نے بھرپور اعتماد کا اظہار کیا، محمد اورنگزیب

محمد اورنگزیب نے پاکستان کے پہلے پانڈا بانڈ کے اجرا کو تاریخی کامیابی قرار دیتے ہوئے کہا ہے کہ عالمی سرمایہ کاروں کی غیرمعمولی دلچسپی پاکستان پر بڑھتے ہوئے عالمی اعتماد کا واضح ثبوت ہے۔

وفاقی وزیر خزانہ سینیٹر محمد اورنگزیب نے اپنے بیان میں کہا کہ پانڈا بانڈ کے کامیاب اجرا سے عالمی مالیاتی منڈیوں میں پاکستان کی ساکھ مزید مضبوط ہوئی ہے جبکہ دنیا نے پاکستان کی اقتصادی اصلاحات اور خودمختار مالی نظم و ضبط پر اعتماد کا اظہار کیا ہے۔

انہوں نے کہا کہ پانڈا بانڈ کا اجرا پاکستان کی عالمی مالیاتی منڈیوں میں مضبوط واپسی کا اشارہ ہے اور اس کامیابی سے بین الاقوامی اقتصادی و مالیاتی روابط کا نیا باب کھلا ہے۔

وزیر خزانہ کے مطابق عالمی سرمایہ کاروں کا مثبت ردعمل اس بات کا ثبوت ہے کہ پاکستان کی اصلاحاتی پالیسیوں اور معاشی تبدیلیوں کو عالمی سطح پر تسلیم کیا جا رہا ہے۔

محمد اورنگزیب نے کہا کہ پانڈا بانڈ پاکستان کے اقتصادی سفر میں ایک اہم سنگ میل کی حیثیت رکھتا ہے اور اس پیش رفت سے عالمی مالیاتی منڈیوں میں پاکستان کی پوزیشن مزید مستحکم ہوگی۔