پاکستان نے امریکاسے پہلی بار60لاکھ بیرل خام تیل درآمدکیاہے، علی پرویز ملک

وفاقی وزیر پیٹرولیم علی پرویز ملک نے کہا ہے کہ پاکستان نے امریکا سے پہلی بار 60 لاکھ بیرل خام تیل درآمد کیا ہے جبکہ پاکستان میں تیل و گیس کی تلاش اور معدنیات کے شعبے میں مشترکہ کام کے مواقع ہیں۔

وفاقی وزیر پیٹرولیم علی پرویز ملک سے امریکی معاون وزیر خارجہ ایس پال کپور نے ملاقات کی ۔اس موقع پر امریکی ناظم الامور سفیر نیتالی بیکر بھی موجود تھیں۔

ملاقات کے بعد جاری اعلامیے میں بتایا گیا کہ علی پرویز ملک نے توانائی کے شعبے میں اصلاحات سے آگاہ کیا۔۔دونوں ممالک کے درمیان یٹرولیم اور توانائی کے شعبوں میں تعاون کے مزید مواقع تلاش کرنے پراتفاق کیا گیا۔

امریکی معاون وزیرخارجہ نے کہا کہ پاکستان اور امریکا ہمیشہ ایک دوسرے کے لیے اہم رہے ہیں۔تعلقات کی حالیہ گرم جوشی کو مضبوط اقتصادی شراکت داری میں بدلا جا سکتا ہے۔

وفاقی وزیر علی پرویز ملک نے کہا کہ پہلی بار پاکستان نے امریکا سے 60 لاکھ بیرل خام تیل درآمد کیا ہے۔

پاکستان میں توانائی کے شعبے میں اصلاحات کے حوالے سے انہوں نے کہا کہ توانائی اصلاحات کا مقصد مقامی وسائل پر انحصار، کارکردگی میں بہتری اور غیر ملکی سرمایہ کاری کے لیے سازگار ماحول پیدا کرنا ہے۔

انہوں نے کہا کہ بندرگاہی انفرا اسٹرکچر، اسٹوریج سہولیات اور ریفائنری اپ گریڈیشن میں تعاون کے امکانات موجود ہیں، تیل اور گیس کی تلاش اور معدنیات کے شعبے میں بھی مشترکہ کام کے مواقع ہیں۔