سٹاک مارکیٹ میں شدید مندی، انڈیکس ایک لاکھ 63 ہزار پوائنٹس کی حد کھو بیٹھا

پاکستان اسٹاک مارکیٹ میں کاروباری ہفتے کے چوتھے روز بھی شدید مندی کا راج رہا، جس کے نتیجے میں ہنڈرڈ انڈیکس ایک لاکھ 63 ہزار پوائنٹس کی اہم نفسیاتی حد بھی برقرار نہ رکھ سکا۔ کاروبار کے آغاز سے ہی فروخت کا شدید دباؤ دیکھا گیا اور انڈیکس میں 3000 سے زائد پوائنٹس کی بڑی کمی ریکارڈ کی گئی، جس سے مارکیٹ ایک لاکھ 62 ہزار 337 پوائنٹس کی سطح پر آگئی۔ گزشتہ روز بھی مارکیٹ 2,588 پوائنٹس کی کمی پر بند ہوئی تھی، جس سے ظاہر ہوتا ہے کہ مارکیٹ مسلسل گراوٹ کا شکار ہے۔ عالمی سطح پر ایشیائی مارکیٹس میں ملا جلا رجحان رہا، جہاں جاپان اور ہانگ کانگ کے انڈیکس میں کمی دیکھی گئی، وہیں چین اور انڈونیشیا کی مارکیٹس میں معمولی بہتری ریکارڈ کی گئی۔