ایرانی جہاز ہماری ناکہ بندی کے قریب بھی آئے تو تباہ کر دیں گے: ٹرمپ

امریکی صدر ڈونلڈ ٹرمپ نے ایران کے خلاف اپنے جارحانہ تیور برقرار رکھتے ہوئے سخت وارننگ دی ہے کہ اگر کوئی بھی ایرانی جہاز امریکی ناکہ بندی کے قریب آنے کی کوشش کرے گا تو اسے فوری طور پر تباہ کر دیا جائے گا۔ سوشل میڈیا پر جاری اپنے ایک بیان میں صدر ٹرمپ نے دعویٰ کیا کہ ایرانی بحریہ کا بڑا حصہ پہلے ہی سمندر کی تہہ میں جا چکا ہے اور اب تک ایران کے 158 بحری بیڑے مکمل طور پر تباہ کیے جا چکے ہیں۔ انہوں نے واضح کیا کہ امریکہ کا ہدف صرف چند چھوٹے جہاز نہیں بلکہ پوری بحری قوت کو مفلوج کرنا ہے۔

صدر ٹرمپ نے ایرانی ‘فاسٹ اٹیک شپس’ کو کم تر قرار دیتے ہوئے کہا کہ ان چھوٹی کشتیوں سے امریکی بحریہ کو کوئی بڑا خطرہ نہیں ہے۔ انہوں نے اپنی عسکری کارروائیوں کا موازنہ منشیات کے خلاف آپریشنز سے کرتے ہوئے کہا کہ ہم اسی طریقے سے کارروائی کر رہے ہیں جس طرح سمندر میں منشیات اسمگل کرنے والی کشتیوں کو نشانہ بنایا جاتا ہے۔ ان کا کہنا تھا کہ یہ کارروائی نہ صرف تیز ہے بلکہ انتہائی سخت بھی ہے تاکہ دشمن کو سنبھلنے کا موقع نہ مل سکے۔

اپنے بیان میں صدر ٹرمپ نے امریکہ کی سرحدی حفاظت اور انسدادِ منشیات کی مہم کا ذکر کرتے ہوئے دعویٰ کیا کہ ان کی انتظامیہ نے سمندر کے ذریعے امریکہ میں داخل ہونے والی 98.2 فیصد منشیات کو کامیابی سے روک دیا ہے۔ انہوں نے اس عزم کا اعادہ کیا کہ ایران کے خلاف بحری ناکہ بندی پر کوئی سمجھوتہ نہیں کیا جائے گا اور امریکی مفادات کے تحفظ کے لیے طاقت کا بھرپور استعمال جاری رہے گا۔ دوسری جانب، عسکری مبصرین کا ماننا ہے کہ صدر ٹرمپ کے ان بیانات سے خلیج میں براہِ راست فوجی تصادم کا خطرہ شدت اختیار کر گیا ہے۔