اداکارہ شردھا کپور کا پاؤں فریکچر، فلم کی شوٹنگ عارضی طور پر روک دی گئی

بالی ووڈ کی معروف اداکارہ شردھا کپور کے پاؤں کی انگلی ڈانس سیکوینس کی شوٹنگ کے دوران فریکچر ہو گئی، جس کے بعد فلم کی شوٹنگ کو عارضی طور پر روک دیا گیا ہے۔

رپورٹس کے مطابق شردھا کپور نوواری ساڑی اور روایتی زیورات پہنے طویل ڈانس سیکوینس کر رہی تھیں کہ ایک لمحے میں انہوں نے غلطی سے پورا وزن ایک پاؤں پر ڈال دیا، جس سے توازن بگڑ گیا اور وہ زخمی ہو گئیں۔

ہدایتکار لکشمن اوٹیکر نے فوری طور پر شوٹنگ روک دی، تاہم شردھا نے یونٹ کو کام جاری رکھنے کی ہدایت دی۔ ممبئی واپس آنے کے بعد وہ کلوز اپ اور جذباتی مناظر کی شوٹنگ بھی کرواتی رہیں، مگر چند گھنٹوں بعد درد بڑھنے کے سبب شوٹنگ کو مکمل طور پر معطل کرنا پڑا۔

فلم ’ایتھا‘ مہاراشٹر کی معروف ڈانسر اور تماشہ آرٹسٹ وتھابائی کی زندگی پر مبنی ہے، جنہیں ریاست کی ثقافتی تاریخ میں ایک عظیم فنکار کے طور پر یاد کیا جاتا ہے۔