ماہیکا شرما نے ہارڈک پانڈیا سے منگنی کی افواہوں کی تردید کردی

بھارتی آل راؤنڈر ہارڈک پانڈیا اور سپر ماڈل ماہیکا شرما کے تعلقات کے حوالے سے گزشتہ چند روز سے سوشل میڈیا پر مبہم افواہیں گردش کر رہی تھیں، تاہم ماہیکا نے پہلی بار خاموشی توڑتے ہوئے تمام قیاس آرائیوں کی تردید کردی ہے۔

افواہیں اس وقت شدت اختیار کر گئیں جب ماہیکا کی منگل وار پوجا میں شرکت کی تصاویر سامنے آئیں، جنہیں مداحوں نے “نئی شروعات” سے جوڑا۔ تصاویر میں انہیں انگلی میں ایک چمکتی ہوئی انگوٹھی پہنے دیکھا گیا، جسے بعض صارفین منگنی کی علامت سمجھ بیٹھے۔

ماہیکا نے انسٹاگرام اسٹوریز کے ذریعے اس معاملے پر ردعمل دیتے ہوئے لکھا کہ ’’انٹرنیٹ دیکھ کر لگتا ہے جیسے میں منگنی کرچکی ہوں، حالانکہ میں تو روز اچھا زیور پہنتی ہوں۔‘‘

ہارڈک پانڈیا اور ماہیکا شرما گزشتہ چند ماہ سے سوشل میڈیا پر ایک دوسرے کے لیے محبت بھری پوسٹس شیئر کرتے رہے ہیں۔ ہارڈک کی سابقہ شادی ناتاشا اسٹانکووچ سے ہوئی تھی، جن سے ان کا ایک بیٹا آگستیا ہے۔ دونوں 2020 میں شادی کے بندھن میں بندھے اور 2023 میں دوبارہ شادی کی رسومات ادا کیں، تاہم 2024 میں انہوں نے علیحدگی کا اعلان کیا تھا۔

ماہیکا کی وضاحت کے بعد یہ واضح ہو گیا ہے کہ دونوں کے حوالے سے گردش کرنے والی افواہیں درست نہیں، اور جو کچھ سوشل میڈیا پر کہا جا رہا تھا وہ حقیقت پر مبنی نہیں۔