زین ملک نے نئے البم میں نصرت فتح علی خان کو خراج تحسین پیش کر دیا

لندن: پاکستانی نژاد برطانوی اسٹار زین ملک نے اپنے مداحوں کو ایک بڑے سرپرائز سے نوازتے ہوئے اعلان کیا ہے کہ ان کا نیا البم ‘کوناکول’ شہنشاہِ قوالی نصرت فتح علی خان کی فنی عظمت کو سلام پیش کرے گا۔ ایک حالیہ انٹرویو میں میزان کے ساتھ گفتگو کرتے ہوئے زین نے انکشاف کیا کہ البم میں شامل ایک گانے کا عنوان ہی “نصرت” رکھا گیا ہے۔

زین ملک کا کہنا ہے کہ اس البم کی تیاری کے دوران انہیں جنوبی ایشیائی موسیقی، بالخصوص نصرت فتح علی خان کے منفرد اندازِ گلوکاری سے گہری تحریک ملی۔ انہوں نے بتایا کہ “نصرت” کا فن آج بھی عالمی سطح پر فنکاروں کے لیے مشعلِ راہ ہے، اسی لیے انہوں نے اس گانے کو ان کے نام سے منسوب کرنے کا فیصلہ کیا۔

تکنیکی لحاظ سے یہ البم کافی تجرباتی ہے، جہاں زین نے اپنی ہی آواز کو مختلف تہوں (Layers) میں ترتیب دے کر اسے بطور ساز استعمال کیا ہے۔ البم کی پہلی ویڈیو “Sideways” 27 مارچ کو جاری ہونے کے بعد پہلے ہی یوٹیوب پر دھوم مچا رہی ہے، جبکہ مکمل البم 17 اپریل کو ریلیز کیا جائے گا۔