سر پر بال لگانے کیلئے مجھے رقم کی پیشکش کی گئی لیکن! انوپم کھیر کا انوکھا انکشاف

ممبئی: بالی ووڈ کے ورسٹائل اداکار انوپم کھیر نے انکشاف کیا ہے کہ انہیں سر پر بال لگوانے کے لیے مختلف کمپنیوں اور ڈاکٹروں کی جانب سے بھاری رقوم کی پیشکش کی گئی، تاہم انہوں نے اسے سختی سے مسترد کر دیا۔ ایک بھارتی میڈیا ادارے کو دیے گئے انٹرویو میں انوپم کھیر کا کہنا تھا کہ وہ بہت سی ‘ہیئر ویونگ’ کمپنیوں اور ڈاکٹروں کا خواب ہیں جو چاہتے ہیں کہ وہ ایک بار ان سے بال لگوا لیں، لیکن انہوں نے کسی کو یہ موقع نہیں دیا۔

اداکار نے واضح کیا کہ چاہے انہیں کتنی ہی رقم کی ضرورت کیوں نہ پڑ جائے، وہ اپنی قدرتی وضع قطع تبدیل نہیں کریں گے۔ ان کا کہنا تھا، “مجھے لگتا ہے کہ اگر میں نے بال لگوا لیے تو پھر میں وہ انسان نہیں رہوں گا جو میں اصل میں ہوں۔” انہوں نے اپنے بیٹے سکندر کھیر کے حوالے سے ایک دلچسپ قصہ سناتے ہوئے بتایا کہ جب سکندر چھوٹا تھا تو اس نے ایک بار اخبار میں ہیئر آئل کا اشتہار دیکھ کر مجھ سے کہا تھا کہ ‘ڈیڈ، اس بارے میں سوچنا بھی مت’۔

انوپم کھیر نے اپنی حسِ مزاح کو اپنی طاقت قرار دیتے ہوئے کہا کہ وہ اپنی شخصیت کے اس پہلو سے خوش ہیں اور نوجوانوں کو مشورہ دیتے ہیں کہ وہ انہیں ‘انکل’ کہنے کے بجائے ‘اے کے’ (AK) یا ‘انوپم جی’ پکاریں۔ ان کا یہ بیان سوشل میڈیا پر ان کے مداحوں کی جانب سے خوب سراہا جا رہا ہے، جو ان کی خود اعتمادی کی تعریف کر رہے ہیں۔