پمز ہسپتال میں عمران خان کی آنکھ کا تیسرا پروسیس مکمل، بینائی تسلی بخش قرار

اسلام آباد: بانی پاکستان تحریک انصاف (پی ٹی آئی) عمران خان کو سخت سیکیورٹی میں پمز ہسپتال لایا گیا جہاں ان کی آنکھ کے علاج کا تیسرا مرحلہ کامیابی سے مکمل کر لیا گیا۔ ہسپتال انتظامیہ کے مطابق، عمران خان کو ان کی اپنی رضامندی سے ہسپتال منتقل کیا گیا جہاں ماہرینِ چشم نے انہیں تیسرا ‘اینٹی وی جی ایف’ (Anti-VEGF) انجیکشن لگایا۔

پمز انتظامیہ کا کہنا ہے کہ اس طبی عمل کے دوران آپریشن تھیٹر میں تمام ضروری احتیاطی تدابیر اور طبی پروٹوکولز پر سختی سے عمل درآمد یقینی بنایا گیا۔ انجیکشن لگائے جانے کے بعد میڈیکل بورڈ نے بانی پی ٹی آئی کا تفصیلی معائنہ کیا اور ان کی بینائی کی صورتحال کو مکمل طور پر تسلی بخش قرار دیا ہے۔

طبی عمل مکمل ہونے اور میڈیکل بورڈ کی کلئیرنس کے بعد عمران خان کو ہسپتال سے فارغ کر دیا گیا۔ واضح رہے کہ بانی پی ٹی آئی گزشتہ کچھ عرصے سے آنکھوں کے عارضے میں مبتلا تھے جس کے لیے انہیں وقفے وقفے سے ہسپتال لایا جاتا رہا ہے۔