برطانیہ کا امریکا کو فوجی اڈے فراہم کرنا جارحیت میں شمولیت تصور ہوگا: عراقچی

ایرانی وزیر خارجہ نے برطانوی ہم منصب سے ٹیلیفونک رابطہ کرتے ہوئے واضح موقف اختیار کیا ہے کہ امریکا کو فوجی اڈے فراہم کرنا ایران کی نظر میں جارحیت میں شامل ہونا تصور کیا جائے گا۔

ایران نے خبردار کیا کہ ایسے ممالک کو جنگ کے حصہ کے طور پر دیکھا جائے گا، اور کسی بھی قسم کی مدد کو براہِ راست شمولیت تصور کیا جائے گا۔ ایرانی قیادت نے پہلے ہی کہا ہے کہ دشمن کے تمام فوجی اڈے ہدف بن سکتے ہیں۔

قبل ازیں وزیر خارجہ عباس عراقچی نے کہا کہ ایران نے اپنی فوجی طاقت کا اب تک صرف معمولی حصہ استعمال کیا ہے، اور اگر ایرانی انفراسٹرکچر پر دوبارہ حملہ کیا گیا تو ردعمل انتہائی سخت ہوگا۔

ایکس پر جاری بیان میں بتایا گیا کہ ایران نے کشیدگی کو بڑھانے سے گریز کیا اور عالمی برادری کی درخواستوں پر عمل کیا ہے۔ موجودہ ردعمل ایران کی طاقت کا صرف چند فیصد ہے، اور جنگ روکنے کے لیے شہری آبادیوں کو پہنچنے والے نقصانات کا ازالہ لازمی ہوگا۔

وزیر خارجہ نے مزید کہا کہ ایران کی ہر کارروائی دفاعی نوعیت کی ہے اور کسی بھی اضافی حملے یا خطرے کی صورت میں سخت اور جامع ردعمل دیا جائے گا۔ ان کے مطابق تحمل اور تعمیری اقدامات ہی خطے میں امن کے قیام کی ضمانت ہیں۔

خیال رہے کہ امریکی میڈیا سی این این کے مطابق ایران کی جانب سے فائرنگ کے بعد ایک امریکی ایف 35 اسٹیلتھ طیارے نے مشرق وسطیٰ کے امریکی اڈے پر ہنگامی لینڈنگ کی جبکہ بی 52 بمبار طیارہ واپس برطانیہ پہنچ گیا ہے