بھارت کیلئے پاکستانی فضائی حدود کی بندش دوسرے سال میں داخل

پاکستان اور بھارت کے مابین جاری کشیدگی کے باعث پاکستانی فضائی حدود کی بندش کا فیصلہ اب دوسرے سال میں داخل ہو گیا ہے۔ پاکستان ایئرپورٹس اتھارٹی (PAA) نے اس حوالے سے ایک نیا نوٹم (NOTAM) جاری کر دیا ہے، جس کے تحت بھارتی طیاروں پر عائد پابندی میں مزید ایک ماہ کی توسیع کر دی گئی ہے۔ اس فیصلے کے نتیجے میں بھارتی رجسٹرڈ، کمرشل اور فوجی طیارے اب 24 مئی 2026 کی صبح 5 بجے تک پاکستان کی فضائی حدود استعمال نہیں کر سکیں گے۔

واضح رہے کہ پاکستان نے اپنی فضائی حدود 23 اپریل 2025 کو بھارتی پروازوں کے لیے بند کی تھی، جس کے بعد سے اب تک بھارتی ایئر لائنز کو متبادل اور طویل راستے اختیار کرنے کی وجہ سے ایندھن اور وقت کی مد میں اربوں روپے کا بھاری مالی نقصان اٹھانا پڑ رہا ہے۔