اب سفر ہوگا اور بھی آسان، گوگل میپ میں بڑی تبدیلی

گوگل نے اپنے مقبول پلیٹ فارم گوگل میپس میں صارفین کے سفر کو مزید آسان بنانے کے لیے مصنوعی ذہانت سے لیس نیا تھری ڈی فیچر متعارف کرا دیا ہے۔

اس جدید فیچر کے ذریعے ڈرائیورز اب تھری ڈی امیجز کی مدد سے راستوں کو بہتر انداز میں سمجھ سکیں گے، جبکہ اے آئی ٹیکنالوجی شاہراہوں کی درست شناخت اور راستے میں موجود رکاوٹوں کی نشاندہی بھی کرے گی۔

اس کے ساتھ ’Ask Maps‘ نامی نیا فیچر بھی پیش کیا گیا ہے، جو صارفین کے ساتھ بات چیت کے انداز میں کام کرے گا۔ یہ فیچر کم رش والے راستے تلاش کرنے، ایک سے زیادہ اسٹاپس کی منصوبہ بندی کرنے اور سفر سے متعلق تفصیلی معلومات فراہم کرنے کی صلاحیت رکھتا ہے۔

گوگل کے مطابق اس اپڈیٹ کا مقصد نیویگیشن کو زیادہ مؤثر بنانا اور صارفین کا وقت بچانا ہے۔ نئے فیچرز کے ذریعے صارفین مقامی مقامات، مشہور جگہوں اور ریستوران کے بارے میں بھی فوری معلومات حاصل کر سکیں گے۔

کمپنی کا کہنا ہے کہ یہ سسٹم دنیا بھر میں موجود تقریباً 30 کروڑ مقامات اور 50 کروڑ صارفین کے ریویوز سے ڈیٹا حاصل کرتا ہے، جس سے نتائج زیادہ درست اور ذاتی نوعیت کے ہو جاتے ہیں۔

گوگل میپس کی وائس پریزیڈنٹ کے مطابق یہ تبدیلی پلیٹ فارم کے لیے ایک اہم پیش رفت ہے، جس کے بعد میپس ہر صارف کے لیے زیادہ ذاتی نوعیت کا تجربہ فراہم کرے گا اور حقیقی دنیا میں سفر کی منصوبہ بندی کو مزید آسان بنائے گا۔