سرکاری ویب سائٹس پر ہیکرز کے تازہ حملوں کے بعد نیشنل سرٹ مزید متحرک

سرکاری ویب سائٹس پر ہیکرز کے حالیہ حملوں کے بعد نیشنل کمپیوٹر ایمرجنسی رسپانس ٹیم (نیشنل سرٹ) نے سائبر سیکیورٹی آڈٹ کا عمل ہنگامی بنیادوں پر مکمل کرنے کا فیصلہ کیا ہے۔ نیشنل سرٹ کی دستاویزات کے مطابق مختلف وزارتوں اور سرکاری اداروں کی کل 300 ویب سائٹس کو سیکیورٹی جانچ کے لیے منتخب کیا گیا تھا، جن میں سے 280 ویب سائٹس (تقریباً 93.3 فیصد) کا سیکیورٹی اسکین مکمل کر لیا گیا ہے۔ متعلقہ محکموں کو ان کی ویب سائٹس میں موجود خامیوں کے بارے میں تفصیلی رپورٹس بھی ارسال کر دی گئی ہیں۔

آڈٹ کے دوران مختلف سسٹمز، سرورز اور ایپلی کیشنز میں انتہائی حساس (کریٹیکل)، ہائی، میڈیم اور لو لیول کی سیکیورٹی خامیوں کی نشاندہی ہوئی ہے۔ ذرائع کا کہنا ہے کہ ڈیٹا لیک اور ہیکنگ کے بڑھتے ہوئے خطرات کے پیش نظر متعلقہ اداروں کو فوری اصلاحی اقدامات، سیکیورٹی اپ ڈیٹس اور ویب ایپلیکیشن فائر وال (WAF) کے مؤثر نفاذ کی سخت ہدایات جاری کی گئی ہیں۔ نیشنل سرٹ کا مقصد ان اقدامات کے ذریعے سرکاری ڈیٹا کے تحفظ کو یقینی بنانا اور مستقبل میں سائبر حملوں کے راستے بند کرنا ہے۔