گوگل کا پاکستان میں اے آئی پروفیشنل سرٹیفکیٹ کے آغاز کا اعلان

گوگل نے پاکستان کے لیے گوگل اے آئی پروفیشنل سرٹیفکیٹ کے آغاز کا اعلان کیا ہے، جو انڈسٹری سے منظور شدہ ایک عملی سرٹیفکیٹ پروگرام ہے۔ اس پروگرام کا مقصد پیشہ ور افراد کو مصنوعی ذہانت (AI) کے عملی استعمال میں مہارت فراہم کرنا ہے تاکہ وہ اپنی روزمرہ پیشہ ورانہ سرگرمیوں میں AI کا مؤثر استعمال کر سکیں۔

گوگل کے مطابق عالمی معیشت میں AI کی بڑھتی اہمیت کی وجہ سے ایسے ماہر افراد کی طلب بڑھ رہی ہے، جبکہ تربیت یافتہ افرادی قوت کی کمی ایک چیلنج بن چکی ہے۔ ایپسوس اور گوگل کی تحقیق کے مطابق تقریباً 70 فیصد منیجرز کا خیال ہے کہ کامیابی کے لیے AI تربیت یافتہ افرادی قوت کی اشد ضرورت ہے، لیکن صرف 14 فیصد کارکنوں کو یہ تربیت فراہم کی گئی ہے۔

یہ پروگرام ’مشق کے ذریعے سیکھنے’ کے تصور پر مبنی ہے اور 20 سے زائد عملی سرگرمیاں شامل ہیں۔ شرکا کو گوگل AI پرو تک تین ماہ کے لیے مفت رسائی دی جائے گی تاکہ وہ جدید AI ماڈلز کے ساتھ براہِ راست مشق کر سکیں اور گوگل ڈوکس، جی میل اور گوگل شیٹس جیسے ٹولز میں ان کا استعمال سیکھ سکیں۔

پروگرام میں 6 جامع کورسز اور ایک اختتامی پروجیکٹ شامل ہیں، جو گوگل کے ماہرین اور AI کے پیشہ ور افراد کی جانب سے تیار کیے گئے ہیں۔ یہ خاص طور پر مصروف پیشہ ور افراد کے لیے ڈیزائن کیا گیا ہے اور اسے 10 گھنٹوں سے بھی کم وقت میں مکمل کیا جا سکتا ہے۔

پروگرام مکمل کرنے کے بعد شرکا کو ہر موڈیول کے ساتھ شیئر کرنے کے قابل ڈیجیٹل سرٹیفکیٹ فراہم کیا جائے گا، جسے وہ لنکڈ اِن جیسے پلیٹ فارمز پر اپنی پروفائل میں شامل کر سکتے ہیں۔ گوگل کے مطابق یہ نصاب حقیقی دنیا کی ملازمتوں کے ڈیٹا اور معروف آجرین کی توثیق کے مطابق تیار کیا گیا ہے۔