عراق میں تیل بردار جہازوں پر حملوں کے بعد عالمی منڈی میں خام تیل مہنگا، قیمتوں میں 9 فیصد اضافہ

عراق کی سمندری حدود کے قریب تیل بردار جہازوں پر حملوں کی خبروں کے بعد عالمی منڈی میں خام تیل کی قیمتوں میں نمایاں اضافہ دیکھنے میں آیا ہے۔

رپورٹس کے مطابق عراقی پانیوں کے قریب دو بین الاقوامی تیل بردار جہازوں کو نشانہ بنایا گیا جس کے بعد عالمی سطح پر تیل کی فراہمی متاثر ہونے کے خدشات بڑھ گئے۔

مارکیٹ اعداد و شمار کے مطابق برطانوی خام تیل کی قیمت میں تقریباً نو فیصد اضافہ ریکارڈ کیا گیا جس کے بعد اس کی قیمت ایک سو اعشاریہ پچاس ڈالر فی بیرل تک پہنچ گئی۔

اسی طرح امریکی خام تیل کی قیمت بھی آٹھ اعشاریہ ستاون فیصد اضافے کے بعد چورانوے اعشاریہ تہتر ڈالر فی بیرل ہو گئی۔

ابتدائی ایشیائی تجارت میں امریکی خام تیل ویسٹ ٹیکساس انٹرمیڈیٹ کی قیمت سات اعشاریہ پانچ فیصد اضافے کے ساتھ ترانوے اعشاریہ اسی ڈالر فی بیرل تک پہنچ گئی۔

ماہرین کا کہنا ہے کہ اگر خلیجی خطے اور آبنائے ہرمز کے قریب کشیدگی برقرار رہی تو عالمی سطح پر تیل کی قیمتوں میں مزید اتار چڑھاؤ دیکھنے میں آ سکتا ہے۔

واضح رہے کہ ایران سے متعلق جنگی صورتحال کے باعث قیمتوں میں اضافے کے بعد عالمی توانائی ایجنسی نے چار سو ملین بیرل تیل جاری کرنے کا اعلان کیا تھا تاہم اس اعلان کے باوجود قیمتوں میں اضافہ دیکھنے میں آیا۔