چیئرمین ایف بی آر نے اضافی کفایت شعاری اور تحفظ کیلیے اعلیٰ سطح کی کمیٹی تشکیل دیدی

وفاقی حکومت کے کفایت شعاری اقدامات پر عمل درآمد کے سلسلے میں چیئرمین ایف بی آر نے اعلیٰ سطح کی کمیٹی تشکیل دے دی ہے جو اضافی کفایت شعاری اور تحفظ کی نگرانی کرے گی۔

ایف بی آر نے ہدایت جاری کی ہے کہ فیلڈ دفاتر اور ہیڈ کوارٹرز کی 60 فیصد سرکاری گاڑیاں فوری طور پر کھڑی کی جائیں، جبکہ فیول اخراجات میں 50 فیصد کمی کی جائے۔گریڈ 20 اور اس سے اوپر کے افسران سے دو دن کی تنخواہ کی رضاکارانہ پیشگی طلب کی گئی ہے۔

مزید براں، 50 فیصد عملے کو گھر سے کام کرنے کی ہدایت دی گئی ہے، جبکہ پائیدار اشیاء کی خریداری پر مکمل پابندی عائد کر دی گئی ہے۔ چوتھی سہ ماہی کے غیر ای آر ای بجٹ میں بھی 20 فیصد کمی کی گئی ہے۔ایف بی آر حکام کو کل 11 مارچ تک عمل درآمد رپورٹ پیش کرنے کی ڈیڈ لائن دی گئی ہے۔