ڈوین جانسن کی افطار میں شرکت کی ویڈیو وائرل، کیا اسلام قبول کرلیا؟

الی ووڈ کے معروف اداکار ڈوین جانسن (دی راک) کی مبینہ افطار تقریب میں شرکت کی ویڈیو سوشل میڈیا پر وائرل ہوگئی ہے، جس کے بعد صارفین کے درمیان اس کی حقیقت پر بحث چھڑ گئی ہے۔

وائرل ویڈیو میں دکھایا گیا ہے کہ ڈوین جانسن رمضان المبارک کے دوران ایک افطار تقریب میں موجود ہیں اور دیگر افراد کے ساتھ روزہ افطار کر رہے ہیں۔ ویڈیو سامنے آنے کے بعد متعدد صارفین نے اسے مختلف سوشل میڈیا پلیٹ فارمز پر تیزی سے شیئر کیا اور اس پر ہزاروں تبصرے کیے۔

کئی صارفین نے اس منظر کو رمضان کے احترام اور مختلف ثقافتوں کے ساتھ یکجہتی کی علامت قرار دیتے ہوئے اداکار کے اس عمل کو سراہا۔ تاہم دوسری جانب بعض افراد نے ویڈیو کی صداقت پر سوال اٹھاتے ہوئے دعویٰ کیا کہ یہ کلپ دراصل مصنوعی ذہانت (AI) کے ذریعے تیار کیا گیا ہو سکتا ہے۔

کچھ صارفین کا کہنا ہے کہ ویڈیو ممکنہ طور پر کسی ایشیائی ملک، خصوصاً انڈونیشیا، سے تیار کی گئی ڈیجیٹل یا اے آئی ویڈیو ہو سکتی ہے، جبکہ بعض نے یہ بھی کہا کہ ویڈیو میں موجود شخص دراصل ڈوین جانسن نہیں ہیں۔

تاحال ڈوین جانسن کی جانب سے اس وائرل ویڈیو کے بارے میں کوئی باضابطہ ردعمل سامنے نہیں آیا اور نہ ہی اس بات کی تصدیق ہو سکی ہے کہ ویڈیو حقیقی ہے یا مصنوعی ذہانت کے ذریعے بنائی گئی ہے۔