کرکٹرز کو اردو بولنی چاہیے، اپنی زبان پر فخر کریں: فیصل قریشی

پاکستان کے مایہ ناز اداکار فیصل قریشی نے قومی کرکٹرز کو مشورہ دیا ہے کہ وہ بین الاقوامی اور عوامی سطح پر گفتگو کرتے ہوئے انگریزی کے بجائے اردو زبان کو ترجیح دیں۔ ایک نجی ٹی وی شو کے دوران گفتگو کرتے ہوئے، جس کا کلپ سوشل میڈیا پر وائرل ہے، فیصل قریشی نے کہا کہ اردو ہماری قومی زبان ہے اور ہمیں اس پر فخر ہونا چاہیے۔ انہوں نے عالمی شہرت یافتہ فٹبالرز کرسٹیانو رونالڈو اور میسی کی مثال دیتے ہوئے کہا کہ یہ بڑے کھلاڑی ہمیشہ اپنی مادری زبان میں بات کرتے ہیں اور دنیا ان کی بات سمجھنے کے لیے مترجم (Translator) کا سہارا لیتی ہے۔ اداکار کا مزید کہنا تھا کہ اگر کسی کو انگریزی نہیں آتی تو اسے شرمندہ ہونے کی ضرورت نہیں، کیونکہ یہ ہماری مادری زبان نہیں ہے، ہمیں اپنی شناخت پر سمجھوتہ نہیں کرنا چاہیے۔