واٹس ایپ میں نیا واٹس ایپ پلس پلان صارفین کیلئے کیوں متعارف کرایا جا رہا ہے؟

واٹس ایپ کی جانب سے بہت جلد ایک آپشنل سبسکرپشن پلان متعارف کرائے جانے کا امکان ہے، جسے واٹس ایپ پلس کا نام دیا جائے گا، جس میں صارفین کو اضافی فیچرز تک رسائی حاصل ہوگی۔

Wabetainfo کی رپورٹ کے مطابق واٹس ایپ پلس پلان میں صارفین کو متعدد چیٹ منیجمنٹ ٹولز، ایپ کسٹمائزیشن اور دیگر اضافی فیچرز دستیاب ہوں گے، جو واٹس ایپ کو مفت استعمال کرنے والے صارفین کے لیے دستیاب نہیں ہوں گے۔ یہ فیچرز اینڈرائیڈ اور iOS دونوں ورژنز میں کام کریں گے، تاہم انہیں ابھی تک جاری نہیں کیا گیا۔

رپورٹ میں بتایا گیا کہ یہ اضافی فیچرز صرف ان صارفین کو دستیاب ہوں گے جو ماہانہ فیس ادا کریں گے۔ تاہم واٹس ایپ کے بنیادی فیچرز، بشمول میسجنگ، وائس اور ویڈیو کالز، میڈیا شیئرنگ اور پرائیویسی فیچرز بدستور مفت رہیں گے۔

واٹس ایپ پلس کی سبسکرپشن میں بنیادی طور پر پرسنلائزیشن اور اضافی فیچرز پر توجہ دی جائے گی، جبکہ بنیادی فیچرز سے علیحدہ رکھا جائے گا۔ ان میں سے ایک فیچر چیٹ پننگ کا ہے؛ موجودہ واٹس ایپ میں صارفین صرف 3 چیٹس پن کر سکتے ہیں، لیکن واٹس ایپ پلس صارفین 20 چیٹس پن کر سکیں گے۔ اس کے علاوہ 14 مختلف ایپ آئیکونز، 19 کلر آپشنز اور دیگر متعدد فیچرز بھی دستیاب ہوں گے۔

رپورٹ میں عندیہ دیا گیا ہے کہ واٹس ایپ وقت کے ساتھ ان اضافی فیچرز میں مزید اضافہ بھی کرے گا، جبکہ کمپنی نے ابھی واٹس ایپ پلس کی فیس یا اسے متعارف کرانے کی تاریخ کا اعلان نہیں کیا۔