پنجاب حکومت کا بڑا اقدام، مستحق فنکاروں کیلئے خصوصی فنڈز قائم

پنجاب حکومت نے مستحق فنکاروں کے لیے 50 کروڑ روپے کا خصوصی فنڈ قائم کر کے انہیں مالی تحفظ فراہم کرنے کا بڑا اقدام کیا ہے۔ یہ پروگرام پنجاب حکومت کی جانب سے پنجاب آرٹسٹ خدمت کارڈ کے ذریعے ترتیب دیا گیا ہے جس کا مقصد فنکاروں کی زندگی کو بہتر بنانا ہے۔

اس پروگرام کے تحت اہل فنکاروں کو ماہانہ 5 ہزار روپے وظیفہ فراہم کیا جائے گا جبکہ ابتدائی مرحلے میں 63 مستحق فنکاروں کو فی کس 15 ہزار روپے ادا کیے جا چکے ہیں۔ وظیفہ کی ادائیگی بینک آف پنجاب کے ذریعے کی جائے گی۔

پروگرام کے لیے سال کے آغاز میں درخواستیں طلب کی گئیں جس کے نتیجے میں مجموعی طور پر 2 ہزار 702 درخواستیں موصول ہوئیں۔ قواعد و ضوابط کے مطابق سکروٹنی کے بعد 1 ہزار 831 فنکار اہل قرار پائے اور ان کا ڈیٹا پنجاب سوشل پروٹیکشن اتھارٹی کو بھجوا دیا گیا، جہاں سے فنڈز جاری کرنے کا عمل شروع کر دیا گیا ہے۔

مزید برآں مستحق فنکاروں کے لیے تعلیمی گرانٹ 3 لاکھ روپے، میڈیکل گرانٹ 2 لاکھ روپے اور دیگر امداد 1 لاکھ روپے مقرر کی گئی ہے۔ 80 سال سے زائد عمر کے فنکاروں کے لیے ماہانہ 10 سے 15 ہزار روپے پنشن دینے کی تجویز بھی زیر غور ہے جبکہ 54 سال سے زائد عمر کے فنکاروں کے لیے ریلیف اسکیم متعارف کروانے کی منصوبہ بندی کی جا رہی ہے۔

یہ اقدام فنکاروں کی فلاح و بہبود کے لیے ایک اہم پیش رفت قرار دیا جا رہا ہے جس سے مستحق اہلِ فن کو مالی سہارا ملے گا۔