ایران پر امریکی واسرائیل حملوں میں شہادتوں کی تعداد555ہوگئی،نطنز نیوکلیئرپلانٹ پر بھی حملہ

ایرانی ریڈ کریسنٹ سوسائٹی کے مطابق ایران میں  امریکا اور اسرائیل کے حملوں میں شہادتوں کی تعداد 555 ہوگئی۔ ایرانی حکام کا کہنا ہے کہ امریکا اور اسرائیل کی جانب سے ایرانی صوبے یزد اور فارس پرتازہ   حملے کیے گئے۔

ایرانی حکام کا بتانا ہے کہ گزشتہ  دو دن کے دوران یزد میں  امریکی و اسرائیلی حملوں میں 27 افراد شہید ہوئے ہیں۔جبکہ فارس میں امریکا واسرائیل حملوں میں35 افراد شہید ہوئے۔

ادھر ایران نے تصدیق کی ہے کہ اس کے جوہری مرکز نطنز نیوکلیئر پلانٹ پرامریکااور اسرائیل نے حملہ کیاہے۔ایران کے نمائندے رضا نجفی نے اقوام متحدہ کی ایٹمی نگرانی ایجنسی کے 35 رکنی بورڈ آف گورنرز کے اجلاس میں صحافیوں سے گفتگو کرتے ہوئے بتایاکہ نطنزمیں  پرامن، محفوظ جوہری مرکز پرپھر حملہ کیاگیاہے۔

ایران نے اس حملے کو بین الاقوامی قوانین کی خلاف ورزی قرار دیا ہے اور کہا ہے کہ جوہری پروگرام پر کسی قسم کے خطرے کے پیش نظر حفاظتی اقدامات کو مزید مضبوط کیا جائے گا۔