امریکی عوام نے ایران پر حملے کو مسترد کر دیا: صرف 27 فیصد شہریوں کی جنگ کو حمایت، صدر ٹرمپ کی مقبولیت میں مزید کمی

امریکا میں صرف ستائیس فیصد افراد ایران پر حملے کے حامی نکلے، نصف کے قریب امریکیوں نے حملے کی مخالفت کردی۔ صدر ٹرمپ امریکیوں میں مزید غیر مقبول ہوگئے۔ امریکا میں ایپسوس سروس کے مطابق تیتالیس فیصد افراد ایران پر حملے کے حق میں نہیں ہیں جبکہ انتیس فیصد اس معاملے میں غیر جانبدار رہے۔ صرف ستائیس فیصد امریکیوں نے ایران پر حملے کو جائز قرار دیا۔ اس طرح ہر چار امریکی شہریوں میں سے صرف ایک نے ایران پر حملوں کی حمایت کی۔ ان میں سے بھی چوالیس فیصد آزاد ووٹرز کا کہنا ہے کہ اگر تیل اورگیس کی قیمتیں بڑھیں تو جنگ کی حمایت نہیں کریں گے۔ سروے کے مطابق چھپن فیصد امریکی مانتے ہیں ٹرمپ دیگر ممالک پر لشکر کشی کیلئے تیار رہتے ہیں۔ ستاسی فیصد ڈیموکریٹس، ساٹھ فیصد آزاد ووٹرز اور تیئیس فیصد ری پبلکنز نے بھی اسی رائے کا اظہار کیا۔ سروے کے مطابق حملے سے صدر ٹرمپ کی مقبولیت میں بھی کمی آئی اور ان کی مقبولیت ایک فیصد کم ہوگئی۔