آٹھ ماہ میں محصولات کا بڑا خسارہ، ایف بی آر کو 450 ارب روپے کی کمی کا سامنا

اسلام آباد: فیڈرل بورڈ آف ریونیو کو رواں مالی سال کے پہلے آٹھ ماہ کے دوران محصولات کی وصولی میں 450 ارب روپے کے نمایاں شارٹ فال کا سامنا کرنا پڑا ہے، جس کے باعث سالانہ ہدف میں مزید کمی کا امکان ظاہر کیا جا رہا ہے۔

ذرائع کے مطابق جولائی تا فروری ایف بی آر نے تقریباً 8.1 کھرب روپے ٹیکس جمع کیا، جو نظرثانی شدہ ہدف سے 450 ارب روپے کم ہے، جبکہ اصل مقررہ ہدف کے مقابلے میں یہ کمی 670 ارب روپے بنتی ہے۔

ابتدا میں ایف بی آر کا سالانہ ہدف 14.13 کھرب روپے مقرر کیا گیا تھا، تاہم عالمی مالیاتی ادارے کے ساتھ مذاکرات کے بعد اسے 216 ارب روپے کم کر دیا گیا۔ اب حکام ہدف میں مزید نمایاں کمی کی تجویز پر غور کر رہے ہیں اور آئندہ ہفتے عالمی مالیاتی ادارے سے اس حوالے سے بات چیت متوقع ہے۔

حکومت نے محصولات میں کمی پوری کرنے کے لیے پیٹرولیم لیوی کی شرح میں اضافہ اور ترقیاتی اخراجات میں کٹوتی کی ہے تاکہ بنیادی بجٹ سرپلس کا ہدف حاصل کیا جا سکے، تاہم ماہرین کے مطابق یہ اقدامات مالی استحکام کا وقتی تاثر دے رہے ہیں۔