میٹا کا سیمی کنڈکٹر کمپنی سے 100 ارب ڈالر کا معاہدہ

ٹیکنالوجی کی دنیا میں مصنوعی ذہانت (AI) کی دوڑ تیز تر ہوگئی ہے، جہاں فیس بک اور انسٹاگرام کی مالک کمپنی ‘میٹا’ نے ایڈوانسڈ مائیکرو ڈیوائسز (AMD) کے ساتھ 100 ارب ڈالر مالیت کے ایک بہت بڑے معاہدے پر دستخط کر دیے ہیں۔ اس تزویراتی شراکت داری کے تحت میٹا نہ صرف اے ایم ڈی سے جدید ترین اے آئی چپس خریدے گی بلکہ اس سیمی کنڈکٹر کمپنی میں 10 فیصد حصص (شیئرز) کی مالک بھی بن جائے گی۔

معاہدے کے مطابق، میٹا اپنے ڈیٹا سینٹرز کو جدید خطوط پر استوار کرنے اور اے آئی پراسیسنگ کی رفتار بڑھانے کے لیے اے ایم ڈی کی طاقتور ‘ایم آئی 450’ (MI450) چپس استعمال کرے گی۔ یہ پیش رفت گزشتہ برس اوپن اے آئی اور اے ایم ڈی کے درمیان ہونے والے معاہدے کی کڑی معلوم ہوتی ہے، جس نے مارکیٹ میں اینویڈیا (Nvidia) کی اجارہ داری کو چیلنج کیا تھا۔ ماہرین کا کہنا ہے کہ 100 ارب ڈالر کی یہ بھاری سرمایہ کاری ظاہر کرتی ہے کہ بڑی ٹیک کمپنیاں مستقبل کی ٹیکنالوجی پر کنٹرول حاصل کرنے کے لیے کس قدر سنجیدہ ہیں۔