کاش مریم نواز کراچی آجائیں تو یہاں کا حال اچھا ہوجائے: مومنہ اقبال

کراچی: معروف پاکستانی اداکارہ مومنہ اقبال نے پنجاب میں جاری ترقیاتی کاموں اور انتظامی صورتحال کو سراہتے ہوئے خواہش ظاہر کی ہے کہ کراچی کے حالات بہتر بنانے کے لیے بھی وہاں مریم نواز جیسی قیادت کی ضرورت ہے۔

سوشل میڈیا پر وائرل ہونے والے ایک ویڈیو کلپ میں مومنہ اقبال کو پنجاب کی تعریف کرتے ہوئے دیکھا جا سکتا ہے۔ انہوں نے کہا، “ماشاءاللہ اس وقت پنجاب کی صورتحال کافی اچھی ہے۔” دورانِ پروگرام جب میزبان فیصل قریشی نے ان سے کراچی کے مسائل پر بات کرنے اور حکمرانوں سے اپیل کرنے کا کہا تو مومنہ نے برجستہ جواب دیا، “میں نے تو خود پوچھا ہے کہ کراچی والوں کا بھی کوئی (وارث) ہے؟ ہمیں بتا دیں۔”

اداکارہ نے مزید کہا کہ اب وہ اپنا زیادہ تر وقت کراچی میں گزارتی ہیں، اس لیے یہ شہر بھی ان کا اپنا ہے مگر یہاں کے مسائل دیکھ کر انہیں دکھ ہوتا ہے۔ انہوں نے مسکراتے ہوئے مشورہ دیا کہ اگر ایک مریم نواز کراچی آ جائیں تو شاید یہاں کا حال بھی اچھا ہو جائے۔ مومنہ اقبال کا یہ بیان سوشل میڈیا پر بحث کا مرکز بنا ہوا ہے، جہاں صارفین پنجاب اور کراچی کے انتظامی فرق پر تبصرے کر رہے ہیں۔