سامعہ حجاب نے عمرہ کی سعادت حاصل کرلی، تصاویر سوشل میڈیا پر وائرل

پاکستان کی معروف ٹک ٹاک سٹار اور سوشل میڈیا انفلوئنسر سامعہ حجاب نے رمضان المبارک کے مقدس مہینے میں عمرہ کی سعادت حاصل کر لی ہے۔ سامعہ حجاب، جو ماضی میں اپنی وائرل ویڈیوز اور سابق منگیتر کے ساتھ قانونی تنازعات کی وجہ سے خبروں کی زینت بنی رہی ہیں، اب ایک نئے روحانی روپ میں نظر آ رہی ہیں۔

سامعہ نے اپنے انسٹاگرام اکاؤنٹ پر مکہ مکرمہ سے تصاویر اور ویڈیوز شیئر کیں، جن میں انہیں مقدس مقامات پر عبادت کرتے ہوئے دیکھا جا سکتا ہے۔ اپنے پیغام میں انہوں نے انکشاف کیا کہ وہ طویل عرصے سے دل اور روح کے سکون کی تلاش میں تھیں، جس کے لیے انہوں نے اپنی عادات بدلیں اور نئے دوست بنائے لیکن کہیں سکون نہ ملا۔ انہوں نے لکھا، “آخر کار اللہ کے فضل سے مکہ میں حاضری دے کر وہ سکون پا لیا جس کی مجھے تلاش تھی۔”

دلچسپ بات یہ ہے کہ سامعہ نے اپنے ساتھ موجود ایک ‘خاص شخص’ کی تصویر بھی شیئر کی ہے جس کا چہرہ انہوں نے دھندلا (Blur) رکھا، جس نے مداحوں میں تجسس پیدا کر دیا ہے۔ سوشل میڈیا صارفین اور مداحوں کی بڑی تعداد نے ان کے اس روحانی سفر پر خوشی کا اظہار کرتے ہوئے انہیں مبارکباد دی ہے اور ان کے لیے نیک خواہشات کا اظہار کیا ہے۔