پاکستان کرکٹ تاریخ کی سب سے مہنگی ڈیل کا امکان بڑھنے لگا

پاکستان سپر لیگ (پی ایس ایل) کے میڈیا رائٹس کی فروخت کے حوالے سے پاکستان کرکٹ کی تاریخ کی سب سے بڑی ڈیل متوقع ہے، جس سے پی سی بی کے خزانے میں اربوں روپے کا اضافہ ہوگا۔ ذرائع کے مطابق ایک پی ایس ایل فرنچائز نے براڈکاسٹ حقوق کے لیے سالانہ ساڑھے چار ارب روپے کی بولی دینے کا ذہن بنا لیا ہے، جس کے تحت 4 سالہ معاہدہ 18 ارب روپے تک جا سکتا ہے۔

تفصیلات کے مطابق پی سی بی نے میڈیا رائٹس کے لیے ٹینڈر جاری کیا تھا، تاہم واجبات کی عدم ادائیگی پر دو بڑے سپورٹس چینلز کو ڈس کوالیفائی کر دیا گیا ہے۔ اب میدان ایک ایسی کمپنی کے لیے خالی نظر آ رہا ہے جو پہلے ہی پی ایس ایل فرنچائز کی مالک ہے۔ لائیو اسٹریمنگ کے حقوق کی بولی بھی 7 ارب روپے تک جانے کی توقع ہے، جس کے بعد یہ مجموعی طور پر ملکی تاریخ کا سب سے بڑا میڈیا معاہدہ بن جائے گا۔

لیگ کے 11 ویں ایڈیشن میں دو نئی ٹیموں کے اضافے سے میچز کی تعداد 34 سے بڑھ کر 44 ہو جائے گی، جو تجارتی لحاظ سے اس ڈیل کی قدر میں اضافے کی بڑی وجہ ہے۔ نئے قوانین کے تحت اگر ڈیل 3 ارب روپے سے تجاوز کرتی ہے تو اضافی رقم کا ایک حصہ غیر ملکی ‘آئیکون’ کھلاڑیوں کی شمولیت کے لیے استعمال کیا جائے گا۔ پی ایس ایل کا 11 واں سیزن 26 مارچ سے شروع ہونے والا ہے۔