وزارت آئی ٹی نے مالی سال 27-2026 کیلئے 1.67 ارب مانگ لئے

وزارت انفارمیشن ٹیکنالوجی نے مالی سال 2026-27 کے لیے 1.67 ارب روپے سے زائد کے فنڈز طلب کر لیے ہیں۔ یہ فنڈز تین اہم منصوبوں — پاکستان سٹارٹ اپ فنڈ، برج سٹارٹ پاکستان اور ای روزگار — کے لیے مختص کرنے کی تجویز دی گئی ہے۔

دستاویز کے مطابق سٹارٹ اپ فنانسنگ اور وینچر کیپیٹل کے لیے ایک ارب روپے رکھنے کی سفارش کی گئی ہے۔ تین سالہ پاکستان سٹارٹ اپ فنڈ کی مجموعی لاگت 3 ارب روپے ہے، جس میں اب تک 13 کروڑ روپے سے زائد خرچ ہو چکے ہیں۔فری لانسرز کے لیے ڈیجیٹل سینٹرز کے قیام اور توسیع کے لیے 26 کروڑ 40 لاکھ روپے مانگے گئے ہیں۔ ملک بھر کے 30 اضلاع میں اب تک 80 ڈیجیٹل سینٹرز قائم کیے جا چکے ہیں، جن میں 6,500 سے زائد نشستیں دستیاب ہیں۔ای روزگار اور ڈیجیٹل سکلز پروگرام کے لیے 40 کروڑ 80 لاکھ روپے کی تجویز دی گئی ہے۔وزارت نے واضح کیا ہے کہ ان منصوبوں کا مقصد سٹارٹ اپ ایکو سسٹم کو مضبوط بنانا، فری لانسنگ کے روزگار کے مواقع بڑھانا اور آئی ٹی ماہر افرادی قوت تیار کرنا ہے۔ یہ اقدامات پاکستان کی ڈیجیٹل اکانومی کی جانب منتقلی کو تیز کرنے میں اہم کردار ادا کریں گے۔